在內地做豬不易，這話非戲言；有媒體曾報道，國內中毒狀態的豬達百分之六十，原因包括萊克多巴胺，即大家熟悉的「瘦肉精」，此外還有抗生素、重金屬、消毒藥的濫用等等，是以有「豬不聊生」之警語。如今，「門常開，菌湧來」，添馬艦新政府總部毒菌愈驗愈有，令特首連三司十二局合共十六個問責官員當中，已有超過九人的私廁「中招」，換言之，問責高官逾半高危，真係應咗「新界王」劉皇發當年「官不聊生」嘅讖語！
劉皇發可算「高人」，一早為夕陽政府蓋棺論定，中晒！五十多億打造「穿心煞」門常開，贏得退伍軍人症桿菌湧來，煲呔曾臨尾整劑「官不聊生」，都算可以為擴大問責制經常被轟浪費公帑搵番個下台階。嗱！做高官除了經常要被立法會班議員質詢，噴到一面口水之餘，又要備受惡菌威脅，真正係官不聊生啊！大家唔好再嘲笑政府係廢柴喇，好唔好？
惻隱之心，人皆有之。好似孫公呢位教育局局長咁，本身已患有腎衰竭，率先中招退伍軍人症桿菌，然而，佢好彩係高官，唔係好似一般平民咁送咗去屯門醫院，否則佢想「視工作為樂趣」都唔得。一息尚存，都要為教育下一代作出貢獻，老朽喺佢身上學識「天行健，君子自強不息」嘅至理，孫公，努力！加油！愛拚才會贏！
本報「政情」版話啲高官，一個接一個排隊放假，可能佢哋係為咗避惡菌？反正老朽就不信，官不聊生啊！大家畀啲同情心好唔好！