政情:粉嶺母嬰院 貼「方便」告示

內地孕婦衝關湧港產子成災,當局日前更公布,位於鐵路沿線嘅粉嶺、油麻地同紅磡母嬰健康院已成為重災區,有四至六成客戶都係內地孕婦。咁啱得咁蹺,區選「票王」北區區議員劉國勳日前去粉嶺母嬰健康院視察,希望同啲北區媽媽傾吓偈時,喺廁所發現一張驚人告示,顯示內地孕婦湧港不但令本港孕婦冇晒床位生仔,隨時連去完廁所想洗手都有困難。

劉國勳視察發現

劉國勳喺佢嘅facebook上載咗張相,顯示粉嶺母嬰健康院內一個廁所洗手盆,上方貼咗一張告示,警告大家「為免病菌傳播,請注重個人衞生,請勿在此大小便」。呢張相一經曝光,網民立即議論紛紛,留言估計張告示都係寫畀內地孕婦睇。

有網民更加話,憑佢喺內地生活嘅經驗,呢張告示所講嘅嘢絕無誇張,仲話見過啲內地人喺名店試身室內小便,反問點解張告示唔用簡體字寫,以方便啲內地孕婦閱讀。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!