政情：麥美娟一條心選立會
工聯會喺九月立法會選舉將會採用「風車戰術」，由區選「票后」陳婉嫻做軸心參選超級區議會，其餘五區亦會派人參加直選互相谷票。其中葵青區議員麥美娟（Alice）盛傳會代表工聯會喺新界西出選，現任新西立會議員王國興則會轉戰港島。最近Alice仲因為咁而放棄角逐連任葵青區議會副主席，以便專心迎戰另一場選戰，似乎佢出選新西已勢在必行。
Alice尋日出席活動時再被問到呢個問題，一向口密嘅佢，點都唔肯透露係唔係會代表工聯會出選新西，僅強調自己最近做咗工聯會新界辦事處主任，要花多啲時間做地區工作，先至唔爭取做區會副主席喎。
不過，一向習慣獨自落區同見傳媒嘅Alice，尋日突然多咗個職員跟身幫佢打點細軟同應付傳媒，據聞係工聯會喺區選後專登派落嚟幫佢手嘅。早前嫻姐宣布東山復出後，工聯會亦有作出類似安排，所以無論Alice點澄清都好，都唔會有人信佢唔選立法會。