審計署早幾年批評過有好多太平紳士冇履行應有職責巡視監獄，不過身兼太平紳士嘅「五散人」立法會議員林大輝，就不時都有親身到監獄了解啲在囚人士嘅福利同訴求。佢最近去大嶼山塘福懲教所巡視時，仲差啲搞到屎上身，由太平紳士變做周身屎。
大輝喺佢最新一期嘅工作報告分享，前排佢同一位來自漁農自然護理署嘅官守太平紳士，一齊坐直升機入去偏遠嘅大嶼山塘福懲教所巡視，兩人一落機，就發現地上滿布「黃金」，之唔係大嶼山嘅特產超巨大牛屎囉﹗
大輝乘機讚自己話，好彩佢夠機警，否則佢同呢位官員都會雙雙中招。之後佢抱怨大嶼山野牛為患，搞到牛糞處處，點知位官員仲好唔識趣咁話，呢啲係漁護署負責嘅範疇，真係自暴其短。大輝又話，呢位官員係第一次去監獄，所以顯得好雀躍，架直升機未停定就想上落，仲搶住坐窗口位睇風景，難怪大輝要撰文寸佢喇！