政情：失魂林D9 區徽落地唔老利
青年論壇或活動往往係庸官出洋相嘅場合，尋日輪到政務司司長林瑞麟（林D9）出席基督教青年會活動時，被台下學生質問佢民望咁低，點樣改善形象。不過，林D9就迴避問題，仲使出「人肉錄音機」本色，狡辯話從事公眾事務永遠都會有爭議，但有爭議唔一定係壞事喎。唔知係咪呢條難題令林D9失神，令佢喺活動啟動儀式中出醜。
活動啟動儀式係幾個嘉賓將手上砌圖拼合成一個郵票圖案，點知林D9甩手，將手上塊印有特區區徽嘅砌圖跌咗落地，雖然佢手快快執番，但區徽話晒係香港象徵，咁跌落地真係大吉利是。
寸長毛留長髮落伍
當林D9離開會場時，畀大批記者追問佢點解唔正面回應民望低，佢就以「趕時間」為由急急腳鬆人。
喺活動上，林D9同學生嘅分享一味交行貨，好似叫學生裝備自己咁，均屬陳腔濫調。不過，有學生問佢點解求學時期留長頭髮，依家做官就剪到咁短，佢就話依家已經唔興長頭髮，仲趁機暗寸立法會議員長毛梁國雄留長頭髮落伍，又叫大家去見工要髮型企理，顧及儀表，唔知佢係咪想寸長毛好唔企理呢？