政情：張建宗 寶Baby 騎呢舞驚人
尋日周末朝早悶悶地，開電視機睇新聞，見到兩位中、老年男士同一班人喺度又扭又跳，場面極盡搞笑滑稽，再睇真啲，原來兩人係勞工及福利局局長張建宗同立法會議員李國寶（寶Baby）。前有食物及衞生局局長周一嶽以一曲走音、甩嘴《忘不了你》技「驚」全港後，估唔到張建宗再下一城，跳出騎呢版「開心舞」震懾市民。特區高官除咗識得娛樂市民之外，仲識做啲乜嘢呢？
話說尋日救世軍喺山頂舉辦一年一度嘅「救世軍港澳定向日」，張建宗同寶Baby都係嘉賓，仲忽然無厘頭跳起舞來。張建宗嘅舞姿真係夠晒爆笑，佢嘅動作有時似荷里活影星尊特拉華特主演嘅經典電影《週末夜狂熱》（Saturday Night Fever），將右手食指朝天擺出電影中嘅招牌甫士，一時又好似齒輪生銹嘅機械人咁左扭右扭，確實令人失笑。
似釋放負能量
不過，牡丹雖好都要綠葉扶持，為張建宗表演錦上添花嘅，莫過於企喺佢身旁嘅寶Baby，雖然佢同張建宗跳嘅舞一樣，但佢嘅手腳就有啲唔協調。老實講，話寶Baby跳緊舞唔夠準確，事關佢啱唔啱拍子已經好難講，加上佢嘅動作完全係不規則，根本有冇音樂都分別不大，所以充其量只能話佢喺度郁動緊，反正佢只係沉醉喺佢自己嘅世界裏面啫。
當張建宗同寶Baby兩個無乜默契地各自「跳舞」時，不禁令人回想起○三年沙士期間，小女孩龍懷騫喺尖沙咀文化中心跳嘅「開心舞」，發放正能量鼓勵全港市民要熱愛生命，時至今日仍然令人津津樂道。但張建宗同寶Baby嘅騎呢版「開心舞」就醜態百出，似釋放負能量多啲，難怪佢兩人嘅表演，喺尋日上晝同中午新聞驚鴻一瞥後，就無再出現過喇。
周一鑊同張建宗分別以攞命歌聲同機械人舞技嚇市民，萬一下屆政府無預佢兩個嘅話，佢哋不妨組番隊「失意的宗嶽」，相信喺街頭表演中樂都可以博得市民一聲冷笑嘅。