中環出更：黃傑龍以守為攻迎戰逆境
傑青兼敍福樓集團執董黃傑龍（Simon），係飲食界「橋王」，面對時下食肆進入淘汰戰，唔搞新意好易被Out，佢於是諗計應戰。繼早前首創「無翅婚宴」後，Simon近日又喺旗下御苑皇宴引入多幅超大LED屏幕，打造360度屏幕婚宴。縱使有滿腹好計謀，但Simon預期今年經濟走下坡，將會減慢擴充步伐。
新店裝十幅巨型屏幕
Simon由土木工程師跳入飲食界，食肆分店愈開愈多，過去兩年合共開咗二十間，踏入新一年，第三間御苑皇宴早前亦已登場，主人家低調無搞剪綵，但幾位飲食界好友包括豪華飲食集團董事總經理陳嘉華、聯邦酒樓集團董事總經理譚兆成及乳酪雪糕店老闆徐文偉等靜雞雞到場，送上驚喜。
Simon話，近年食材瘋狂加價，生意難做，佢計劃未來半年只係開多一間上海菜館，以守為攻。講番佢間新店，斥資數百萬元安裝十幅巨大電視屏幕，連天花板都唔放過，造成「十幕同播」嘅矚目效果。呢個大膽新嘗試，估唔到啲新人都好buy，新店開張前，已吸引逾百對新人訂場，確係有計。