政情：龔仁心自減人工 月薪100
華懋慈善基金喺已故華懋集團主席龔如心嘅千億遺產爭案中終極勝訴，華懋慈善基金主席龔仁心不敢怠慢，即時投入慈善及義工工作。據聞身兼華懋集團執行董事兼管治委員會主席嘅龔仁心決定身體力行，由今年開始每個月只收一百蚊象徵式人工，相反華懋旗下員工就有薪加，又有分紅同雙糧，相信華懋員工聽到後都會好雀躍。
一向對善事不遺餘力嘅龔仁心自爆，佢今年將會踏入人生一個新階段，因為佢由今年開始每個月只收一百蚊人工，佢話︰「總之自己嘅人工上限同下限都係一百蚊，有乜行差踏錯都由呢一百蚊開始扣（減）。」
龔仁心自動減人工回饋社會，對華懋員工則繼續有情有義。龔仁心話，華懋旗下員工加薪、分紅同雙糧都有，反而笑言自己冇人工點會有分紅喎。至於新春佳節期間會否外遊充電，龔仁心話暫時未有計劃，反而佢一直記掛在心頭嘅係，佢由今年開始減咗人工，應該更落力做好義工同埋慈善有關嘅工作喎。