添馬艦新政府總部同立法會大樓被揭十多處有退伍軍人症桿菌，喺入面返工嘅公務員人人自危，雖然煲呔曾等政府高官先後託詞死撐同趕工入伙無關，但佢哋嘅行動已出賣自己，發現至少有三名局長高官安排好輪流放假，疑似大難臨頭各自飛，話佢哋唔係避毒菌都冇人信啦！
根據港府尋日刊登嘅憲報，除咗之前已確診退伍軍人症桿菌、患有腎衰竭嘅教育局局長孫明揚休假至尋日，運輸及房屋局局長鄭汝樺都由今日開始放假，到下周二回任局長職務。緊隨其後放假嘅係財經事務及庫務局局長陳家強，由下周一開始連放五日，計埋周六及周日，即係連放七日假。
被指喺驗收添馬艦建築群有疏漏嘅行政署，署長麥綺明亦懶理退伍軍人症桿菌風波不斷升溫，二話不說由尋日開始為期一個月嘅悠長假期，直至下月五日才回任署長職務，期間職務由副行政署長兼任。夕陽政府面對毒菌淨係識放假，佢哋喺危難當前有幾大承擔真係一眼睇晒。