政情：立會飯堂快開張 議員雀躍
民以食為天，自從政府總部同立法會搬去添馬艦後，唔少公務員或喺立法會做嘢嘅人都大呻添馬艦無啖好食。不過，艱苦嘅日子終於過去，事關立法會餐廳將會喺下周一（九日）開張，我哋睇過佢哋嘅餐牌，唔單只菜式多，而且價錢相宜，但係好唔好食仲有待食客試菜。尋日一班泛民主派議員就走入餐廳參觀，一見菜牌就滿懷感慨話：「以後有啖好食喇！」
立法會餐廳招標過程一波三折，由去年立法會搬屋前已經開始，可惜搞到依家先開張，真係等到頸都長。佢哋開張後，逢星期一至五朝八晚七，星期六朝八午三都有嘢食賣，睇番佢哋個餐牌，中、西、日、韓、台、越菜都有，當然唔少得香港地道茶餐廳食品啦，午市最貴嘅叫餸連飯配例湯或熱飲，都只係四十二蚊，凍飲亦只係加一蚊；石鍋飯配例湯仲抵，盛惠三十六蚊，相比起政府總部東翼飯堂，無論款式同價錢都勝一酬。