政情：煲呔曾漠視女權
婦女事務委員會主席高靜芝做埋今個月就會卸任，臨別秋波，佢將多年受咗政府嘅怨氣發洩晒出嚟，狠批政府做嘢慢，又唔肯畀錢，搞到處處受壓，好多提議要用上幾年先有少少進展。佢仲話，換咗煲呔曾做特首之後仲衰，婦委會差啲要摺埋，好彩煲呔曾做事一向「有頭無尾」，加上當年啲姊妹團體力撐，先可以保留到今日。
改革歎慢板唔科水
婦委會○一年成立時，高靜芝已經係創會會員，至○六年做埋主席，轉眼已做咗十一年。佢之前同傳媒聚會時話，最開心為個會定咗策略框架及出版《婦女發展目標》，為香港婦女權益定下長遠發展目標，唔使再靠「短視」嘅政府。不過，一講到政府，平時形象溫文爾雅嘅佢都忍唔住狠批政府做嘢慢得過分，好似增加婦女喺諮委會嘅比例，就足足等咗十年，真係好鬼激氣。
高靜芝又話，政府做嘢慢唔在講，最弊係唔肯撥資源，好似婦委會到依家仲係同勞工及福利局共用一個秘書處，可惜乜嘢都係以政策局嘅工作行先，婦委會名副其實係做「二奶」。問佢如何評價新舊特首對待婦女政策，佢好淡然話：「一個（前特首）係成立，一個（煲呔曾）想摺埋。」
佢憶述，○七年煲呔曾一度想將安老事務委員會、青年事務委員會同婦委會合併，組織一個高層次嘅家庭事務委員會，好彩當年各個地區嘅姊妹團體力撐頑抗，一日收幾封信叫政府唔好一意孤行，加上煲呔曾做嘢一向「有頭無尾」，婦委會先可以避過一劫。
對於婦權未來路向，高靜芝話希望下任特首可加強婦委會功能，如設立婦女事務基金，等婦委會可以透過基金資助地方婦女團體，建立有效嘅網絡，仲可以培訓更加多地區婦女領袖。據聞下任婦委會主席嘅大熱係現任婦委會成員劉麥嘉軒，真係唔知到時會變成點喇。