中環出更：霍震寰新年願望 家和萬事興
已故全國政協副主席霍英東嘅長房三子霍震宇，早前入稟法庭，控告胞兄霍震寰（Ian）侵吞遺產及家族公司股份，令全城轟動。Ian早前曾發表聲明，表示對訴訟事件感到心痛，尋日佢現身中環香港會所食晏，睇嚟仍顯得心事重重。不過，Ian心繫家人，新年願望係想家和萬事興。
寒風襲港下，Ian尋日一支公去香港會所食晏，勤練武術嘅佢，穿起西裝已覺暖笠笠，連大褸都唔使着。呢餐飯，未見有飯腳，Ian食到下午兩點幾就鬆人。卓妮上前問佢同邊個食晏，Ian就笑而不答。
有信心拆掂爭產風波
問到爭產風波一事，Ian話事件如今已進入司法程序，唔想講太多，但佢承認兄弟姊妹間有為此事感到不快。見慣風浪嘅佢，有信心事件只係家庭小事一樁，最終會傾得掂喎。農曆新年快到，Ian會否趁機約細佬食團年飯密密斟就唔知喇。
轉過頭，卓妮又見到新鴻基地產非執董郭炳湘（Walter）食完晏行出嚟。近期樓市同天氣一樣「凍過水」，未知Walter點睇？可能因為寒風刺骨，佢三扒兩撥就跳上名貴座駕，隔住車窗同卓妮講拜拜。