中環出更：明天更好基金 「工廠妹」助陣
明天更好基金一眾核心成員尋日齊集灣仔君悅酒店，喺基金執行委員會主席陳啟宗（Ronnie）帶頭下，眾人喜氣洋洋拎住揮春、吉祥掛飾提早與市民拜年，氣氛好熱鬧。
陳啟宗鄧淑德避談特首戰
留職停薪出任特首參選人梁振英競選辦公室副主任嘅基金行政總裁鄧淑德（Karen），唔避忌大方出席，但就全程封口唔提選舉話題，而經常對政經議題高談闊論嘅Ronnie，把口好似黐咗膠布咁，連樓價問題都以「你估我係神仙咩！」擋架，認真詭異。
備受Ronnie盛讚嘅基金理事劉鳴煒，尋日未有現身，Ronnie擺明撐梁營，而劉鳴煒就投靠唐營，估唔到特首選舉令兩人各走各路。Ronnie好大方笑住講，佢冇睇錯人，話劉係叻仔，仲話同劉再見亦是朋友喎！
唔講政治，其實一眾理事們好好傾。尋日現身嘅仲有稻香行政總裁梁耀進、「九巴金公主」伍穎梅、時尚界名人虞茱迪、先施董事總經理馬景煊等人。現場仲有一位靚女新面孔，佢係家族生意專做禦寒手套嘅昌利行太子女林曉盈，被問到點解加入基金，佢笑稱：「可能佢哋需要工廠妹啩！」靚女真係識講笑。
梁耀進就話，飲食業今年最大嘅挑戰係請唔到工人，所以佢哋絞盡腦汁將工作流程自動化，除咗用洗碗機、八達通付款之外，今年將引入自動點菜系統，畀客人喺等位時就叫好點心餸菜，一入座就即刻入單，慳番啲人手喎。
卓妮