店舖阻街 食環署懶執法
北區近年發展迅速，有關店舖阻行人路投訴亦相應增加。上水居民阿萍表示，新康街一帶有多間店舖經常將貨物擺放行人路，由於上址人流頻繁，無路可行的市民會行出車路，令現場險象環生，「我知呢度係上水其中一條最旺嘅街，但都唔好擺得咁過分，特別呢區好多老人家，行出馬路真係分分鐘冇命！」阿萍不時途經上址，但從未見食物環境衞生署職員到場執法，「連政府都冇人理，咁就梗係愈擺愈誇張啦！」
食環署發言人表示，接獲本報轉介後已即時派員巡查，並對五間違例店舖進行檢控。而過去一年，當局共接獲八十八宗有關上址一帶店舖阻街的投訴，期間向各有關負責人提出三十八宗檢控。
「有咁多單投訴，但檢控就一半都冇，唔怪得啲舖頭完全唔驚啦！」阿萍直斥食環署執法欠阻嚇性，建議當局認真檢討，「個問題一直都解決唔到，都好應該諗吓依家啲罰則係咪唔夠力！」