遊樂地墊損毀 房署遲修
屋邨遊樂場深受小童歡迎，設施一旦因耗損而久未維修，即令小朋友「有得睇、冇得玩」。慈雲山慈樂邨居民李先生指出，毗連樂合樓的遊樂場地墊損壞多時，房署卻一直只以鐵馬圍封，遲遲未有維修迹象，「已經爛咗幾個月，我仲見過有啲小朋友跳上啲鐵馬度玩，不知幾危險！」
慈樂邨物業服務辦事處發言人表示，上述遊樂場地墊因自然損耗而有輕微拱起現象。為保障使用者安全，已於附近加設鐵馬圍封，並安排工程更換地墊，預計有關工程可於今個月內完成。
當區區議員袁國強表示，遊樂場地墊曾於一年前重新鋪設，疑質素不佳令地墊迅速老化，要求承辦商改以較優質用料，「佢哋一直都係話訂緊貨，希望真係可以喺今個月內搞掂，個公園好多小朋友玩o架！」