嚟緊周日就係泛民主派特首初選投票日，到時市民可以投票決定究竟想民主黨何俊仁抑或民協馮檢基代表泛民出戰選特首。泛民尋日喺港鐵站外模擬當日嘅投票程序，點知用嚟投票嘅平板電腦一度上唔到網，班工作人員仲要搞咗成十分鐘先整番好，認真出師不利。
籌委會召集人鄭宇碩即刻出嚟解畫，話尋日只係模擬投票，實際運作時就會無問題。佢又三番四次強調所有票站已經做過無線網絡測試，又話準備咗五架支援車以備不時之需。
除咗要準備硬件外，社民連早前亦揚言會狙擊泛民嘅投票站，幫手嘅公共專業聯盟主席莫乃光就拍心口話，籌委會一定應付到，必要時咪搵警察幫手囉。有人擔心要出示身份證可能會引起私隱問題，又話驚學生嘅電腦會畀人搶走，搞到莫乃光鬼咁無奈，最後佢發晦氣話今次搞嘅民間投票只屬業餘性質，同政府嗰啲根本無得比喎。