中環出更：郭少明獲頒院士雙喜臨門
尋日下午寒風細雨，冬意甚濃，好多政商界名人無懼寒流現身理工大學，齊賀莎莎國際主席郭少明（Simon）、前發展局常任秘書長麥齊光、已故善長梁顯利嘅兒子梁紹鴻、夏利里拉酒店董事夏雅朗、尖沙咀街坊福利會理事長蘇仲平等六位傑出人士，獲頒授院士榮銜。此起彼落嘅恭賀聲，令現場氣氛暖笠笠。
每逢政府發出寒冷天氣警告，大家就會聽到梁顯利社區中心呢個露宿者避寒之地。咁啱尋日天氣咁凍，大家見到梁顯利嘅兒子、有「舖王」稱號嘅大鴻輝興業主席梁紹鴻，都特意上前同佢打招呼，仲對佢嘅善舉讚不絕口添。
今牛一收最佳禮物
講番獲頒授院士榮銜嘅Simon，獲得眾多親友及政商界老友撐場，包括德國寶老闆陳國民、保良局副主席梁寶珠及顏金煒、總理陳正欣等，人氣旺盛。原來今日係Simon牛一，相信獲頒榮銜係佢最好嘅生日禮物，難怪郭家上下團結撐場，連老當益壯嘅母親都現身添！
卓妮又同麥齊光傾咗幾句，佢啱啱當選工程界選委，問佢有冇興趣參選九月立法會，佢笑稱時間尚早，冇諗呢件事喎！