中環出更：施家總動員撐榮懷膺廠商會長
中華廠商聯合會尋晚換屆，黃友嘉正式卸任會長，由副會長施榮懷（Irons）接棒。政商界猛人無懼寒流，與逾八百嘉賓齊舉杯慶賀，情緒咁高漲，Irons都深受感染，致辭時忘形話：「今日外邊天氣好熱！」大家都知佢講笑，引來哄堂掌聲。
廠商會喺會展筵開逾七十席，Irons向每枱賓客送上廠商會御用紅酒，希望大家盡興而歸，嘉賓亦唔客氣，輪流敬賀主人家。Irons重視親情，爸爸施子清、施家四兄弟齊出動撐場。
方平大送新會呔
廠商會永遠名譽會長陳永棋、楊孫西；第一副會長陳淑玲、副會長顏吳餘英、吳永嘉、徐炳光，仲有該會立法會代表林大輝都賞面到賀。其他商會「一哥」都畀足面，中華總商會會長蔡冠深、工總主席鍾志平都嚟恭喜一聲，賓客逼爆會場。
廠商會常董方平帶頭送大禮，贊助近一百八十條玫瑰紅色新會呔，由旗下領呔廠生產，誠意十足。
Irons上任後，預計忙足三年，事關由佢今屆起，會由兩年一屆任期，延長至三年一屆。廠商會今屆會董人數更係歷年之冠，由九十六人增至一百人，眾志成城，齊心搞旺商會。
外圍經濟波動，預計今年經濟下行風險大，李錦記太子爺兼廠商會會董李惠中就話，預測今年充斥不明朗因素，但佢相信有危亦有機，會努力做好家族生意，穩中求勝。
卓妮