「好客之道，又點少得你」，呢兩句宣傳口號大家應該耳熟能詳。問題係，香港嘅好客之道到底夠唔夠班呢？以前未必有答案，家陣有嘞，可惜係一個丟人現眼嘅答案。
法國調查機構Presence發表報告，對全球三十個城市嘅著名商業購物街打分排名，新加坡烏節路名列榜首，請鼓掌！
調查機構明查暗訪，新加坡烏節路由於出色嘅接待服務以及街道衞生而得分最高。緊隨其後嘅亞軍係購物環境出眾嘅盧森堡自由大道。至於全球聞名嘅巴黎香榭麗舍大道，處於中游位置第十六名。調查員認為，喺香榭麗舍大道散步令人心曠神怡，路人親切友好，而且盡可能為遊人提供幫助，不過商家嘅接待同服務不夠熱情，缺乏微笑。
心水清嘅讀者一定會問，點解功夫茶講咗咁耐都冇提到香港？香港好好歹歹都算係旅遊之都吖，有乜理由缺席於全球三十個城市商業購物街排名？冇錯嘞，問得好，功夫茶之所以講咁耐都冇提到香港，原因係香港嘅排名非常之低，低到如果將每個城市嘅排名逐個講，相信講到天光都冇機會提到香港。
呢嗱嗱嗱，坐定定喇，唔好嚇到四腳朝天，香港嘅排名係幾乎包尾，位於墊底嘅第二十九名！
調查機構指出，香港有六成路人不夠友好，冇幫助遊客嘅意願。換言之，香港嘅好客之道十分低劣，低劣到變成趕客之道。
講真吖，香港嘅趕客之道又點止路人不夠友好吖，淨係惡導遊強迫購物已經令人聞風喪膽。記唔記得惡導遊阿珍呀？記唔記得惡導遊阿蓉呀？甚至有遊客懷疑由於導遊態度惡劣而激死，都咪話唔誇張。
黑店林立又係另一問題，宰客成風令到香港蒙羞。商務及經濟發展局數字顯示，海關、消費者委員會及旅遊發展局由○八年至去年十月，共收到三百一十五宗涉及店舖懷疑售賣冒牌成藥嘅投訴，而且有上升趨勢。
冇耐前嘅平安夜，竟然有內地遊客去到旅館被拒諸門外，幾乎要流落街頭。拒諸門外嘅原因有兩個講法，第一個講法係旅行社職員話喎，早已預約房間並且全數付款，不過旅館將房間高價賣咗畀其他人；第二個講法係旅館負責人話喎，入住前一日收到旅行社來電要求取消房間預約，而且索取退款，所以冇房接待。其實，無論邊一個講法係真，香港嘅好客之道已經醜死怪。
所以話啫，當局建議成立一個暫稱旅遊業監管局嘅全新監管機構，方向無疑係正確嘅，香港枉稱旅遊之都，其實滿街趕客之道，唔好好監管點得呀！不過咁，除咗好好監管，好客之道亦唔少得你o架！