探射燈：同袍熱議 高層眼不見為淨
男警被揭束馬尾出更，收工後變身女性一事，引起警隊議論，香港警務督察協會主席曾昭科稱，不同警區警員均互相討論：「其他環頭嘅伙記會八吓，仲話乜呢個原來係師兄嚟o架，都好靚女喎！不過同一環頭牛頭角分區嘅伙記，因為大部分都知道呢件事，所以都唔會好哄動。」
事實上，對於變性人警員，警隊高層過往均會採取「眼不見為淨」的態度，只要見不到就會「當唔知」。據知該「變性警」已駐守牛頭角分區警署四年，已到調「環頭」的階段，有警隊消息人士透露，相信發生今次事件後，「變性警」將會被調到不需要出外執勤的內勤部門。
編配崗位少接觸市民
另外，曾昭科又表示警方會以巿民的角度考慮變性警員的工作安排，「盡量會安排啲少接觸市民嘅工作，好似行政同內部Indoor嘅工作咁，好似呢位長髮男警，佢負責揸警車，工作都好少接觸市民。」
至於「變性警」束馬尾出更，曾昭科指其裝束已不符警隊的服裝要求，「警隊對男、女警的衣着、頭髮都有特定的要求，軍裝男警員一定要短髮、唔可以有『的水』，要正正方方咁剪，而女警就要紮髻！不過呢個警員身份比較尷尬，呢個只係暫時性，我哋會包容！不過長期就唔可以咁，可能佢排緊期做手術啫！」
警方發言人指根據警隊政策規定，警務人員在當值穿着制服時均須保持儀表整潔。而警務人員的日常工作會因應警區的行動需要，由上級作出安排。至於其他查詢，因涉及個人私隱，處方不便回應，但警方會本着「關顧員工」的原則，如獲悉有員工在心理或生理上需要獲得協助或特別照顧，處方會為當事人及其家屬提供支援。