政情：葉劉囡囡擔心變孤兒
添馬艦新政府總部同新立法會大樓都驗出有退伍軍人症嘅惡菌，一眾高官同議員隨時中招。以前做過政府，依家轉做立法會議員嘅新民黨主席葉劉淑儀，尋日由新總部行返新大樓開會時，就話自己驚都未驚過，反而囡囡Cynthia就好緊張，擔心一旦媽咪唔好彩染病，已經單親嘅佢會變成孤兒，真係大吉利是！
葉太早前同Cynthia去咗澳門度假，一返港就遇上退伍軍人症危機。佢強調自己成日落區，因此隨身帶備酒精消毒液，每次洗手都會用，唔擔心經由新大樓嘅食水喉感染細菌，佢反而埋怨新大樓嘅廁所水系統好有問題，成日未解決完就會自動沖水，有時仲會沖幾次，嘥水兼嚇親人。佢估計今次惡菌風波都係因為趕工同搬得太急出事，好似以前新機場大混亂咁，總之講到尾又係煲呔曾唔啱啦！