工商專業聯盟（工專聯）成立至今都好似冇乜實質工作成果，但最為人熟悉反而係破鏡重圓加入聯盟嘅自由黨同經濟動力，過去屢次傳出口和心不和，但據聞工專聯最近終於齊心一意做番件實事，就係分工合作搞好維園年宵攤檔，據講自由黨同經濟動力負責撲水，專業會議就提供人力支援。
意見紛紜嘅工專聯表面同心協力做好年宵，但究竟喺年宵擺檔期間會否一心一意冇爭拗，仍有待觀察，事關工專聯嘅團隊精神尚未展現，例如去年底區議會選舉未有派人打正旗號參選，今年九月立法會選舉亦係同一命運，即自由黨、經濟動力同專業會議會繼續各自參選，以免突然變陣影響選情喎。
話時話，工專聯喺選舉呢啲大是大非面前，都未能統一戰線各自為政，如何可以說服工商專業界相信佢哋有更大牙力向港府爭取權益，實在好難講，話唔埋一個唔啱又拆檔就弊喇。