投資推廣署尋日透過政府新聞處發新聞稿，內容係宣傳巴黎時裝品牌第三間分店喺尖沙咀開幕，原本該署幫外地企業來港開舖做宣傳無乜問題，之不過呢間時裝店已非首次進駐本港市場，該署咁樣做法，一來嘥資源，二來會唔會令人覺得過分硬銷呢？
該品牌年前已於銅鑼灣利園及中環ifc開咗兩間分店，今次喺九龍區開第三分店，投資推廣署竟然用咗成版近千字，長篇大論咁幫手做宣傳，仲訪問埋時裝店創辦人嘅創辦理念同未來發展添，成個名人專訪咁樣，莫非該署近期得閒無嘢做要搵功課交差？
話時話，本地市場嘅競爭愈來愈激烈，旺區舖租愈來愈貴，政府幫外地企業大事宣傳，但本地嘅企業又可以透過啲乜嘢部門幫手去做推廣呢？難怪好多立法會議員經常批評政府唔幫本地中小企喇。