政情：張炳良與行會說再見
夕陽政府快將收檔，取而代之係新一屆政府，連帶作為「橡皮圖章」嘅行政會議會換班底。行會非官守成員張炳良就話，自己已經做咗七年行會，「要吸收嘅經驗有喇，要畀（政府）嘅角度有喇」，係時候讓畀其他人做咁話。張炳良講到咁實牙實齒，睇來下屆行會未必會見到佢喇，但佢會否繼續從政就仲係未知數。
尋日電台播咗張炳良嘅錄音訪問，除咗交代唔再做下屆行會成員外，仲臨別依依提醒啲特首參選人，雖然好多人期望新特首會帶領本港經濟發展，但更多人會問嘅係會唔會失去香港核心價值，呢啲都係特首要答嘅問題喎。
訪問中，張炳良又自爆年輕時已對政治好有興趣，記得五十年代仲係後生仔嘅時候，為咗了解啱啱成立嘅新中國，就走去左派戲院睇內地電影，每當毛主席出鏡時啲人就會企起身，認真趣怪。張炳良仲試過喺學校孖同學仔搞十．一及雙十活動，搞到畀老師鬧佢做乜喺學校講政治喎。