政情：黃春平驚青緊急逃生
當選為觀塘秀茂坪北區議員嘅黃春平，自從被揭發做過中聯辦高層後，一直無公開交代自己嘅真正身份，傳聞佢返咗內地，但無人知佢去咗邊。究竟係咪中央叫佢參選以滲入香港政壇？點解做區議員搞到連英文名拼音都要改？種種疑團一直未解。尋日觀塘區議會首次會議，春平兄終於現身，原本佢話會後交代疑團，但最後就搞到要由逃生門落荒而逃，都唔知佢驚乜，結果再製造多個謎團。
春平兄尋日抵達觀塘區議會後，即被記者重重包圍，呢位前中聯辦高層話，自己唔係共產黨員，強調自己係循合法途徑、經入境處來香港，但實際係乜計劃就無可奉告。春平兄又話，自己係合法參選區議會，至於佢喺中聯辦工作已經係十年前嘅事，話自己唔知十年前嘅事都要寫出嚟，所以無向街坊隱瞞身份喎。
全程齋講「我已經答晒」
春平兄喺會後孭埋背囊離開時，又被傳媒追訪，於是有個區議會秘書現身幫佢解圍，話春平兄稍後會到升降機口正式回應，但唔知點解，佢講講吓忽然轉身衝入個寫住「如非必要，切勿使用」嘅緊急逃生出口，由三樓一直走到地下，全程淨係講：「我已經答晒」，就連對未來議會工作嘅睇法，都係話：「我已經答晒」。
大家對春平兄嘅忽然驚恐感到莫名其妙，惟有一直追、一直問，但佢唔肯停低之餘，仲一邊叫記者小心，一邊推開記者，最後跳上咗一架的士落荒而逃。點解春平兄會咁驚恐呢？何不大方企定定交代清楚呢？
另外，各區議會陸續選出正、副主席，觀塘區由陳振杉、蘇麗珍冧莊；黃大仙就係李德康、黃錦超；大埔區就係張學明、文春輝；灣仔區係孫啟昌、吳錦津。另外，沙田、西貢及離島區議會都會喺今日開會，傳聞離島區正副主席選情仲有暗湧添，聽講仲未傾掂數，最後花落誰家今日自有分曉。