中環出更:澳洲度蜜月 劉燊濤凍到病

新婚燕爾嘅香港工業總會主席劉展灝囝囝、飛騰錶業品牌經理劉燊濤(Gary),婚後同太太吳奕筠(Daphne)去咗澳洲度蜜月,歎足八日溫馨嘅二人世界。期間兩人盡歎海鮮、玩浮潛,又適逢Daphne生日,成個假期甜蜜到不得了。不過,原本係夏天嘅悉尼天氣驟變,氣溫最低只得九度,凍到一對新人都冷病返港。

最低9℃ 老婆都捱唔住

今次係兩人首次去澳洲,諗住好好地享受陽光與海灘。第一站去到大堡礁,天氣晴朗,Daphne仲攬住鱷魚仔影相添,但Gary就笑稱自己只係夠膽攬住隻樹熊喎。跟住兩人轉戰悉尼,點知一落機就唔對路,一陣陣寒風凍到入心入肺。

Gary話,佢出發前上網查過應該有廿五度,但係停留四日期間,氣溫最低九度,高極都只係十五度,想臨時添購禦寒衣物都唔得,事關當地店舖賣嘅都係夏天衫,結果佢唯一一套長衫褲着足咁多日,兩人最終都捱病咗。雖然天氣咁掃興,但好彩二人世界依然溫馨,唔知會否兩個去三個返呢?兩人好夾嘴形,話要過吓二人世界,順其自然喎!

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!