香港警察愈來愈似秘密警察，因為辦事作風愈來愈秘而不宣。記者以前靠追蹤警方通訊趕赴案發現場，從而向市民報道真相，確保新聞自由不受損害。之但係，警方以數碼化改善通訊系統為名，截斷傳媒得知案情嘅渠道，然後選擇性發放資訊，記者往往被蒙在鼓裏。
除咗警方之外，消防處又話數碼化改善通訊系統喎，實際作用同樣係截斷傳媒知情渠道，等於強制記者「熄機」。難怪立法會議員炮轟政府賴皮，學者質疑各大部門為咗維護形象，忽視公眾利益，扼殺市民知情權。
秘密警察到底點樣秘而不宣呢？嗱，有實例你睇。去年十月將軍澳出現見人就捅嘅「口罩刺客」，失驚無神將四個路人捅到血濺街頭。正常而言警方梗係要盡快公布消息㗎啦，等街坊街里謹慎防範吖嘛。死得佢吖，警方居然粒聲唔出，事後冇向傳媒報料，累到市民懵然不知身邊有個危險人物。
另外一單又係離譜到極，觀塘翠屏邨連續有四名女學生慘遭「撞胸色魔」批㬹非禮，警方竟然又係黑箱作業，只係靜靜雞通緝一名年約六十歲禿頭男子，不過冇對外公布消息，經過四日之後先至曝光。喂，警方隱瞞等於將無知少女置於險境啫，幾冇品呀！
記者一來報道真相，二來更加有機會幫警方破案。好似○一年咁吖，化名「香港拉登」嘅馬照聲威脅策劃「港版九一一事件」，落手喺超級市場食品下毒，《東方日報》記者收到消息之後不但協助警方搵到被下毒嘅食品，而且成功拘捕馬照聲。你話嘞，如果唔係正義傳媒拔刀相助緝拿狂徒歸案，香港容乜易出現集體中毒慘劇！
選擇性發放資訊呢家嘢，廉署都唔好得去邊，話要考慮至少八項準則，先至會決定是否公開有關案件嘅資料。到頭來，廉署想公開乜就公開乜，想隱瞞乜就隱瞞乜。
簡單咁講，特區政府採用嘅唔係「通報機制」，而係一套「瞞報機制」，新聞自由愈來愈受到摧殘。
講到新聞自由受到摧殘，功夫茶不得不提兩件事。冇耐之前立法會舉行答問大會，保安人員粗暴阻撓記者採訪，表現仲惡過中國公安。另一件事就係港大保安風波，黑衣人為咗保護國家政要，既橫蠻對待示威者，亦處處限制記者採訪。
你知啦，新聞自由受到摧殘好大鑊㗎，真相無人知道嘅情況之下，香港警察隨時真係變成中國公安，特區政府話唔定會出現獨裁政權。黑箱作業不受監察吖嘛，暴君就可以無法無天！
功夫茶有必要再次大聲疾呼，政府不得賴皮，還我新聞自由！