夕陽政府民望插水，市民對煲呔曾管治無能尤其失望，最新評分僅四十八分。
煲呔曾為人好吹水，又缺乏自省能力。早幾日佢喺大氣電波又大放厥詞，話今年同下屆政府嘅交接安排係新嘗試，揚言希望成為一個典範。佢仲死要面，話香港政治環境要求愈來愈高，喺政治鬥爭更加明顯之下，「無辦法唔學識好多樣嘢」。
信不信由你，以煲呔曾嘅剛愎自用，想學精、學識好多嘢——睇怕要等第二世！孔夫子就話：「假我數年，五十以學易，可以無大過矣。」煲呔曾自詡「政治家」，卻連歷史都無興趣，一個不懂歷史嘅人，錯將「民主」等如「文革」嘅人，講真，做九流政治家嘅資格都冇！
弱勢政府施政失誤連連，本報「投訴版」為政府作嘅年結指出：投訴政府的個案一年多過一年，淨係去年就接獲逾三萬一千宗投訴。嗱！呢啲數字就會講話，反映的是政府部門因循苟且，官僚不得民心！好心煲呔曾唔好咁唔知醜，仲話要乜鬼「典範」啦！
講多都失禮街坊，一個新政府總部入伙四個多月，咁都成為播菌溫床，人人自危，同文譏之為「門常開，病常來」、「門常開，菌常來」，認真抵死！病又好菌又好，總之係唔老利！其實，歸根究柢，又係煲呔曾好大喜功，為咗宣讀佢份最後施政報告，至搞成咁！好心佢喺剩餘的有限日子，醒醒定定，施政唔係神奇胸圍，一味靠托，梗有「穿幫」嘅時候。醒啲喇，政治家！