政情：嫻姐身在區會心在立會
新一屆十八區區議員尋日元旦日履新，當中以工聯會「票后」陳婉嫻重返政壇最有睇頭。嫻姐履新並無即時落黃大仙龍上選區，反而走咗去馬鞍山參加工聯會千人行大運。問嫻姐有乜區會工作大計，佢就好宏觀話想連接九龍東各個地區，加強區內經濟活動，同埋諗吓點樣可以活化舊啟德機場塊地喎，莫非佢個心已宏觀到去九月立法會選舉？
嫻姐安心專注搞大政策都不無道理，事關地區工作可交由經驗豐富嘅徒弟林文輝幫手，有輝哥睇檔實掂。講番行大運活動，嫻姐嘅新年願望係想班打工仔人人有工開、有人工加；佢仲大彈現場安排得唔係咁理想，話有條欄杆阻住台上嘉賓同台下參加者溝通，就好似政府同市民之間嘅溝通有嘢阻住咗咁。嫻姐咁都搵到位鬧政府，阿姐即係阿姐。