政情：港鐵新CEO車站做騷冧客
港鐵新行政總裁韋達誠（Jay Walder）尋日履新，任期三十個月，接替宣布退休、六十一歲嘅周松崗。韋達誠前晚大除夕已開工，落港鐵站同乘客逐一握手影相及講新年快樂。之後佢去咗位於青衣車務控制中心「辣更」，了解列車通宵運作嘅情況。
美國出生嘅韋達誠今年五十二歲，喺英、美從事鐵路行業超過廿年。佢來港前曾任紐約大都會運輸局主席兼行政總裁，主要管理紐約嘅巴士服務同長島鐵路等公共運輸服務，任內曾經提出大幅加價同裁員等措施，引起不滿。雖然佢作風強硬，但都識得落區做騷呢啲門面嘢，莫非佢想一改過去作風，等上任後好辦事？