尋日民建聯（民記）喺金鐘添馬公園舉行二十周年黨慶活動，都算係重頭項目，但我哋就見唔到身在政府工作嘅黨員撐場，包括商務及經濟發展局局長蘇錦樑（Greg蘇），似乎冇乜黨性。政界就有傳聞話，民建聯為咗今年立法會選舉力保不失，點都要同現屆政府保持距離，所以就算黨員都無得傾，一日喺政府入面，一日都唔可以太親密，否則分分鐘變成死亡之吻。
除咗Greg蘇外，民政事務局政治助理徐英偉及發展局政治助理張文韜都無到場，聽講係同現時搞到一鑊粥嘅《競爭法》有關。雖然競爭法已變成無牙老虎，但有部分仍未獲商界接受。
民記若要向商界交代就要向政府開炮，但Greg蘇算係自己人，搞到唔知鬧唔鬧好，又擔心畀政治對手話放生自己友，隨時連累九月立法會選情，所以大家都扮到好似劃清界線，扮晒無乜兩句咁。
不過，民記主席譚耀宗否認晒呢啲傳聞，佢話今次黨慶只係邀請咗幾類人，包括黨中委、監委、顧問、區議員同立法會議員等，由於Greg蘇係官員，所以無邀請喎，但至於點解唔叫官員，佢就無解釋喇！