政情：煲呔曾似偏愛女童軍
煲呔曾任期仲有半年就收檔，但佢親疏有別嘅作風繼續惹來風波。上周五香港童軍總會百周年晚宴，主人家請佢做嘉賓，但佢無端端缺席玩失蹤，只係拋低一句「有啲事要做」，完全冇責任感。有自稱「老童軍」嘅人就睇唔過眼向本報爆料，話煲呔曾身為童軍總會總領袖，過去已經有兩次「放飛機」缺席男童軍活動嘅前科，但就親疏有別去撐太太曾鮑笑微任會長嘅女童軍總會活動，莫非煲呔曾對女童軍有特別情意結？
老童軍踢爆令港蒙羞
根據童軍總會會章，特首必然係童軍嘅總領袖，職責之一係「扶植及鼓勵香港童軍運動」，但有老童軍踢爆，話煲呔曾咁多年嚟，似乎無乜履行責任，好似前年年底童軍總會喺大嶼山搞咗個百周年大露營，一早出晒請柬話煲呔曾會以總領袖身份出席，當日有成五千幾個童軍參加呢項盛事，而且仲有各國駐港領事在場，點知煲呔曾一個唔該玩甩底，敷衍了事，令香港蒙羞。
唔知煲呔曾係咪有鋪放童軍飛機癮，去年十月底童軍總會搞大會操，煲呔曾又係無咗影，只係派下屬出席就算，似乎完全無視自己係總領袖嘅身份。老童軍話，回歸前歷任港督都好重視童軍，年年都會出席大會操，估唔到呢個優良傳統，回歸十幾年就被煲呔曾一手摧毀。
煲呔曾對男童軍無承擔，但對女童軍就情有獨鍾。上兩個月女童軍總會有個九十五周年紀念活動，佢老婆曾鮑笑薇係會長固然要出席，但唔知點解煲呔曾又跟住老婆去，不請自來，咁做不外乎兩個原因，一係佢好唔鍾意男童軍，一係佢對女童軍特別鍾愛囉！其實係乜嘢原因都好，結論係好符合佢大細超兼親疏有別嘅性格。我哋問過特首辦點解係咁，但至截稿前都未有回覆。最後，老童軍大嘆好彩，因為煲呔曾就快走人，呢啲無信用嘅人，唔使再影衰童軍喎！