中環出更：洪為民雙喜派對迎新年
去舊迎新，菁英會主席洪為民（Witman）上周五大搞「雙喜」派對，一次過慶祝四十三歲生日，順便同老友預早迎新年。Witman正日生日係一月三日，但佢愛熱鬧，趁除夕前一晚包下銅鑼灣一間酒吧搞派對，菁英會兄弟及IT界行家好友齊到賀，逾百人齊唱生日歌，氣氛高漲。
銜頭多多嘅Witman，新年願望係做博士。佢話，月前諗住報讀人民大學法學博士課程，點知掛住競逐IT界特首選委會，錯過咗報名期，日內會再敲門，希望補到飛。
施榮懷幾千蚊換新「Look」
菁英會創會主席施榮忻早前一索得男，講願望，當然係希望兒子順利出世兼健康成長。佢哥哥、廠商會候任會長施榮懷，就換上新眼鏡迎新年，原來佢舊嗰副已戴咗六年，加上老花深咗，一於花數千元換新Look，副眼鏡似乎幾旺佢，事關今年工展會生意額較去年上升三成幾。
有份喺工展會擺攤位嘅「燕之家」老闆白富鴻都豐收，燕窩較去年賣多兩成。叙福樓集團執董黃傑龍話，有望攞到斯里蘭卡燕窩出口代理權，大可一齊投資。睇嚟只要識食腦，今年不愁無「錢」途喎。