中環出更：郭少明舉家紅噹噹催運

名人愛駒元旦多跑第二

莎莎老闆郭少明同大女郭詩慧分別有愛駒落場，太太羅桂珍攞住鮮紅色鱷魚皮手袋，女婿陳振邦着鮮紅色外套現身撐場，十分搶鏡。可惜「綻放美麗」只係得第二，另一匹「締造美麗」亦告落空，不過一家人旨在高興，勝負都冇計。

卓妮又見到剛剛就任中西區山頂區議員嘅陳浩濂（Joseph），佢同太太Louiza及爸爸陳兆安夫婦共同擁有嘅愛駒「朗天」又係跑第二，穩袋近三十萬獎金。現任渣打銀行高層兼自由黨黨員嘅Joseph話，本身工作好忙，平日返銀行工作，周六處理黨務，依家做埋區議員，惟有盡量分配時間，當務之急係搵議員辦事處。

陳兆安夫人（左起）、陳浩濂及夫人、陳兆安及兩位親友齊入馬場湊熱鬧。（何偉鴻攝）

董中浩（右）同董吳玲玲拍住拖入場，大晒恩愛。（溫國佳攝）

農曆新年好快又到，理文造紙主席李運強夫婦話會去新西蘭購良駒，佢覺得當地馬匹血統好，勝出機會高，期望新一年拉多啲頭馬喎。明彩集團主席董中浩同太太董吳玲玲拍住拖入馬場，董太穿着鮮艷民族服裝配短靴，中西合璧好特別。佢話件衫喺上海訂造，上面繡咗條龍，夠晒節日氣氛。

卓妮