失蹤咗超過廿四小時嘅煲呔曾，尋日下晝終於現番身，去沙田體育學院擔任精英運動員協會活動嘅主禮嘉賓。當時天氣其實尚算和暖，但係就見佢着咗件頗厚嘅超高樽領冷衫，包實晒條頸，唔知佢係純粹體弱怕凍親，定係有病甚至做過手術唔肯講，要借件超高樽領衫遮住條頸。
煲呔曾喺活動後，為自己忽然「玩失蹤」解畫。佢解釋，前日甩底同佢嘅身體狀況無關，多謝大家關心，又話自己早幾日已知道聖誕節有私人事務要處理，但由於要上京述職，冇辦法下惟有延遲處理「嗰件事」，到尋日點都要抽時間做埋。但講嚟講去，煲呔曾都講唔到究竟因乜事而搞到要臨時甩底，始終解唔到佢今次離奇失蹤嘅疑團。