第一代「單車王子」洪松蔭（阿松，圖）前日同一班青少年分享人生經驗，話自己年少時已經以世界單車冠軍做目標，仲特登喺深水埗鴨寮街，買咗件被譽為單車壇最高殊榮嘅世界場地單車錦標賽「彩虹戰衣」老翻貨嚟激勵自己添！
話說阿松當初入港隊開始艱苦訓練，同行本來有三十個隊友，三個月後得番佢一個。熱愛單車嘅佢並冇因此打退堂鼓，反而去鴨寮街買咗件只有世界單車冠軍先至有嘅「彩虹戰衣」老翻貨，着起佢嚟影相，然後將張相貼喺床頭，等自己每朝起身都望到，藉此鞭策自己。
阿松又話年少時家境清貧，於是一邊讀書，一邊兼職賣麵包、喺五金工廠打工賺錢。佢又提醒有志循運動發展嘅青少年，要有妥善嘅人生計劃，先至可以做到優秀運動員。
