政情：Tim霍快閃 避談細佬爭產

身家估計高達三百億元嘅已故全國政協副主席霍英東家族爆發爭產官司，長房三弟霍震宇早前入稟法院，控告二哥霍震寰侵吞亡父嘅十四億遺產，令身為長房大哥嘅體育界立法會議員霍震霆（Tim，圖右）做咗夾心人，開口幫邊個都唔好，惟有長期潛水，到尋日先至露番面，先後出席兩項體育界活動。不過佢喺兩項活動都極速早離場，避過記者追問。

Tim霍尋日朝早首先出席一項除夕龍舟活動擔任主禮嘉賓，佢左一句公務繁忙，右一句趕時間，要求主辦單位將原定喺十一點舉行嘅下水禮，提早半個鐘開波，幫龍舟點完睛後就極速「鬆人」。

Tim霍下晝再到沙田體育學院撐本港精英運動員，活動期間照例唔接受訪問，活動結束後更趁其他嘉賓離場同接受傳媒訪問時，極速經秘道離開。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能，財經資訊，實時實發！