政情：立會首日封飛起佗衰家
執咗一季都未執完甩漏嘅添馬艦立法會新大樓，最近仲畀旁邊嘅新政府總部拖累，爆發退伍軍人症桿菌疑雲，要有關當局補做檢驗，真係一波未平一波又起。
可能為咗沖喜一下，順便慶祝新年，立法會即將推出紀念郵票，標誌住新大樓嘅落成，不過各式郵票同首日封嘅設計都飛起咗新政府總部同埋新特首辦大樓，費事再被夕陽政府拖累。
新大樓紀念郵票產品將會喺今個月十一日開始公開發售，總共有三款產品任君選擇，包括價值五十蚊、一套十二款嘅郵票；價值八蚊，蓋上一月十一日郵戳嘅首日封；仲有限量發售嘅禮物套裝，內裏有齊全套郵票連首日封，盛惠八十蚊。有興趣嘅市民可以親身到立法會禮品店選購。
睇番啲郵票，不外乎新大樓日與夜嘅外貌，以及各個會議室同會議廳嘅環境，反而首日封嘅設計有啲玄機，新大樓外貌兩座建築物清晰可見，反觀遠景嘅新政府總部東西翼就隱隱約約，而最高層嘅司長辦公室同旁邊嘅新特首辦，更直頭唔見咗，驟眼望好似兩座完全獨立嘅建築物，擺明當煲呔曾同兩大司長唔存在，真係設計得好有心思。