政情：林D9膺最應下台高官
唔經唔覺，二○一一年又同大家講再見，夕陽政府嘅壽命亦進入倒數階段。前排我哋搵咗幾位唔同黨派嘅立法會議員，講吓佢哋嘅聖誕願望，今次我哋再搵另外四位議員，回顧一一年嘅點滴。其中兩人不約而同話，一一年最應該下台嘅高官，就係民望低到不堪仲可以升職加薪嘅政務司司長林瑞麟（林D9）。點解唔係煲呔曾？因為喺好多人心目中，已成跛腳鴨等收工嘅煲呔曾，根本同落咗台冇分別，完全不值一提。
以往成日疾呼「真係離晒大譜、可怒也」嘅民主黨副主席劉慧卿，舊年多咗話要「和平理性非暴力非粗口」，但係一講到林D9，卿姐即時怒上心頭，喪鬧林D9擔任政制及內地事務局局長時強推替補機制，觸發廿二萬人喺七一上街，點知一個屈尾十竟然有官升，難怪卿姐火燒心喇！
「煲呔曾不嬲都係o架啦」
唔單止卿姐，社民連議員長毛亦點名鬧爆，林D9係一一年最應該下台嘅高官。長毛嘅長期打擊對象都係煲呔曾，何以今次唔選煲呔曾做最應下台高官呢？長毛淡淡然咁話：「煲呔曾不嬲都係o架啦，唔使問。」
長毛同卿姐又異口同聲話，一一年最令佢哋開心嘅事，就係全球多個國家同地方嘅示威者，都成功改變咗世界。卿姐形容「人民好犀利，自己站起嚟」。長毛就以十個字作結：「茉莉花革命，佔領華爾街！」
建制派議員唔知係出於厚道定係保皇，並冇指名要邊位高官下台，但係委婉嘅言詞中，亦睇得出佢哋對勞工及福利局局長張建宗、食物及衞生局局長周一嶽，同埋環境局局長邱騰華極度不滿。
工聯會議員葉偉明形容一一年確係悲喜交集，雖然成功爭取到法定最低工資，但標準工時同全民退休保障仍然遙遙無期，張建宗至今仲係交白卷。民建聯議員陳克勤就喜見政府復建居屋、優化置安心，令青年中產上車有望，不過一講到內地孕婦逼爆公立醫院問題由年中提到年尾，周一嶽都做唔到嘢，結果要阿爺出手，仲有近日深港兩地連番爆發禽流感，就真係令佢為之氣結囉！
推行環保政策唔係跪低爛尾、就係做騷擾民嘅邱騰華，去年因為搞唔掂兩電大幅加價，亦成為多名議員心目中嘅最廢高官亞軍或季軍，同樣應該下台。希望隨着新一年開始，班政府高官會錯少啲，等市民開心啲，祝大家新年進步、事事如意！