中環出更：林建康 鄧鉅明陪妻遊星洲
剛過去嘅聖誕假與周六日相連，令唔少城中大忙人有機會休息耐啲，同家人及朋友結伴出外旅遊，其中愛沙尼亞共和國駐港名譽領事林建康同太子珠寶鐘錶主席鄧鉅明，就趁呢個長假期去咗新加坡吃喝玩樂，不過今次牽頭嘅唔係佢兩個，而係兩人嘅太座。
林建康同鄧鉅明都係馬場常客，互相認識咗好耐，但都唔夠林太黃寧艷同鄧太宣宏雁咁老友，佢哋不但用埋同一款手袋，連聖誕節都一齊帶老公同遊星洲。
原來林太本身係新加坡人，一年四季都會返家鄉探親，而鄧太本身又好鍾意去星洲旅遊，話好喜歡當地嘅風土人情，覺得個城市好靚，每次去都會嘗盡當地美食，好似海南雞飯、喇沙咁。鄧太笑笑口話，佢哋兩家已經唔係第一次同遊星洲，每次跟林太去，對方都會盡地主之誼，帶佢四圍搵好嘢食，真係開心。
朱繼陶睇舖焗留港
至於鄧鉅明嘅姊夫、太子珠寶鐘錶執董朱繼陶呢個聖誕就冇得去玩，佢笑說如果個個都去晒旅行，邊個睇舖呀！唔緊要，新一年又到咗喇，而且好快又有農曆新年假期，等多一陣咪有得去玩囉。