中環出更：童軍百年宴林鄭好「睇」得
新一年新開始，香港童軍總會嘅發展亦同步邁進新一頁，皆因該會剛剛成立咗一個世紀，前晚喺灣仔會展舉行百周年晚宴，筵開一百四十席，近千八位童軍領袖及賓客共同見證呢個重要時刻，非常熱鬧。
當晚「好打得」嘅發展局局長林鄭月娥擔任主禮嘉賓，平時着開行政套裝嘅佢，罕有穿上黑色連身裙，配以珍珠耳環及頸鏈，盡顯東方女性嘅嫵媚，令人眼前一亮，晚宴主席王國強（KK）見到都忍唔住要讚好。
景鴻環球集團董事長關景鴻（Eddie）同太太黃玉芳以及兩位千金溫馨撐場。原來關太係香港童軍總會嘅新界東地域會長，佢喺加拿大生活時已經加入咗童軍，一眨眼就做咗廿幾年。大女Jackie剛剛喺加拿大讀完書返港，好學不倦嘅佢，話仲想去內地進修普通話，方便第時跟爸爸返內地傾生意。
卓妮又見到恒生銀行副董事長兼行政總裁梁高美懿兩夫婦，佢哋同KK係多年老友。梁太新年願望好簡單，就係身體健康同家庭幸福。
席上仲有一班仁愛堂成員，原來仁愛堂副主席鄧錦雄身兼晚宴副主席，所以拉大隊嚟湊熱鬧。仁愛堂另一副主席歐雪明，聖誕同老公李鋈麟各有各忙，不過總理張瑋傑肯定更加忙，因為太太Isabella身懷龍胎，已有兩位千金嘅佢，今次終於博到個龍仔，真係可喜可賀。
關景鴻擲33萬「日行一善」
全晚高潮係慈善拍賣環節，拍賣品包括價值連城嘅百周年金牌、翡翠玉茶壺、1911年法國紅酒等，競投反應非常熱烈，但全場嘅戲肉始終係蜚聲國際嘅國學大師饒宗頤捐出嘅「日行一善」墨寶，襯晒童軍總會嘅主題，最後由Eddie豪擲三十三萬元奪得，成為全晚成交價最高者。
卓妮