呢一份自命「公信第一」嘅爛鬼《明報》，簡直不知所謂，而且令人煩厭！
因乜事幹功夫茶咁勞氣？冇嘅，公信其實已經破產嘅《明報》又搞小動作，含沙射影抹黑《東方日報》。你話吖，是可忍，孰不可忍？
件事係咁嘅，法庭有一單官司，《明報》報道：「幼時受肝病困擾的十八歲青年，幸獲安排到澳洲換肝撿回一命，長大後更代表香港出戰器官移植人士運動會，卻因一時貪念踏上歪路。」到底係乜歪路？究竟干犯何罪？由於官司尚在審理，功夫茶唔方便講太多，以免法官大老爺又話藐視法庭。簡單咁講啦，呢一單官司涉及網上詐騙錢財。
官司案情唔係重點，重點係《明報》嘅處理手法，居然利用背景資料撩是鬥非，所作所為十足十陰險小人。《明報》聲稱，被告八個月大時因為肝臟衰竭，急需肝臟移植，後獲東方日報慈善基金籌得過百萬元，資助佢去澳洲做手術執番條命，被告後來因為貪念而誤入歧途云云。
好嘞，對於呢一種處理手法大家覺得有冇問題？梗係有啦，《明報》根本就係以極之奸狡嘅處理手法引導讀者，企圖將「犯罪分子」同「東方救人」夾硬混為一談，搞到好似東方日報慈善基金當日救咗一個壞人咁。《明報》將一單詐騙錢財嘅官司，扯上「他接受《東方日報》訪問時承諾日後會竭盡所能回饋社會及向有需要者施助」，好明顯係含沙射影喇！
呢嗱嗱嗱，所以話啫，爛鬼《明報》確係不知所謂，直情係一個陰陽怪氣嘅太監，居然連善事都要抹黑。東方日報慈善基金歷年來助人無數，當年資助八個月大嘅小朋友換肝，完全出於善心，同小朋友長大之後犯案係風馬牛不相及嘅兩件事，點解硬係要穿鑿附會令人產生無限遐想呢？你話《明報》唔係居心叵測，搵鬼信啦！
係人都知，太監最大嘅特點係心理變態，《明報》成日自吹「公信第一」，自得其樂，自我滿足，根本就係典型嘅太監心態。可惜，太監就係太監，點吹都冇用，《明報》烏龍百出，笑料多多，幾乎每日都要「更正與澄清」一番，公信早就破晒產喇，仲吹乜鬼吖！
喂，功夫茶問一聲，《明報》究竟想點？含沙射影意欲何為？任何動機唔該光明正大公告天下，東方一定奉陪到底，畢竟邪不能勝正，小老鼠永遠贏唔到巨人。
正所謂，人有人格，報有報格，一份報紙鬼鬼祟祟，陰陽怪氣，不斷透過卑劣行徑騷擾同行，絕對係衰衰格格！