雙英特首戰白熱化，日日都曝光搶鏡，泛民代表好似無聲無氣咁，但其實民主黨主席何俊仁同民協馮檢基，下個月八日已經要決戰泛民內部嘅特首初選，贏咗可以代表泛民參選特首。鐵頭仁同阿基同樣擔心市民唔知泛民有初選，估計總投票人數最多得兩萬幾人喎。
阿基尋日好坦白咁講，泛民參選人做特首機會係零，但做足選舉工程，只因想話畀市民聽，泛民有能力搵人做特首，而唔係只識做反對黨。不過佢擔心一月八日嗰日只得萬幾人投票，基於四大原因，包括大部分市民唔知道泛民有初選機制，又唔知可以跨區投票，又以為要登記做選民先有得投，但其實出示身份證就得，不過阿基話，肯畀身份證嘅市民又唔慌多，所以計落條數唔多人去投。
鐵頭仁就比阿基樂觀啲，認為有兩萬幾人投票，佢仲話泛民財力不夠政府，只設立到七十二個票站，而且做唔到全港性宣傳，所以有兩萬人投票，都算交到功課咁話。