政情：陳啟宗三千蚊影證件相

好多選委都申報自己嘅「曬相錢」，但呢張並唔係宣傳海報嘅相，而係提名表格嘅證件相。咁究竟影一打證件相要幾多錢呢？地產及建造界選委何超鳳就用咗廿二個半，漁農界自動當選嘅陳振中只係用咗五蚊。有啲可能用番舊相，所以無申報。不過地產及建造界選委、恒隆地產主席陳啟宗影三張證件相就足足用咗三百九十七個半﹗

原來陳啟宗特登喺十一月花咗千九蚊，預約咗兩小時攝影師，又用千二蚊整三個背景，連埋沖曬費，影兩打證件相一共用咗三千幾蚊，不過陳啟宗勝在夠均真，只係申報咗三張證件相嗰三百幾蚊。同樣咁均真嘅仲有恒生銀行女大班梁高美懿，佢開支達九千三百幾蚊，其中有七千幾蚊，係恒生員工提供嘅服務。