政情：搞導賞 立法會變犯法會？
警方去年引用《公眾娛樂場所條例》檢控一眾支聯會成員，結果令到呢條根本冇乜人識嘅法例重現人間，亦令到全港市民明白到，若然政府唔喜歡，不管你係乜政見都好，只要你喺公眾地方演講或者講故事，有關當局就可以檢控你，都咪話唔得人驚。原來不知不覺間，立法會議員都可能犯咗法。
為咗對抗呢條惡法，工黨立法會議員何秀蘭（Cyd）去信律政司司長，要求對方發出草擬證明書，等佢可以提出私人草案修訂呢條法例，將演講同講故事剔出規管範圍。阿Cyd仲透露，民政事務局今日將會主動刊憲，先行將立法會剔出規管範圍。
要特別將立法會剔出規管範圍，據了解係因為立法會眾議員不時都會搞啲立法會導賞團，期間少不免要講解吓啲設備，甚至講吓歷史咁，政府諗過度過，都覺得呢啲行為隨時令班議員惹官非，所以咪主動修訂囉。話時話，到底立法會新大樓開幕至今，有幾多個議員已經犯咗法都唔知呢？