政情：民記得罪「轎伕」冇運行
沙田地區政團公民力量同民建聯一直以來都係好拍檔，不過事情可能有變。公民力量孖埋鄉事派打算另起爐灶，明年立法會選舉，民記現任立法會議員陳克勤好可能忽然發現舉目無親，一時間唔知抬轎嘅人去晒邊。消息人士透露，事情有咁嘅發展，係有人使橫手，推倒原本可以獲委任做區議員嘅現屆沙田區議會主席、公民力量韋國洪，矛頭直指現屆副主席、民建聯嘅彭長緯。
陳克勤受影響最大
公民力量喺新界東就實力雄厚，本身同民建聯關係密切，民記副主席劉江華本身亦係公記創辦人之一，就喺呢個背景下，公記次次選舉都會為民記抬轎。韋國洪今次疑似畀民記中人打小報告，消息人士就講到明，劉江華若然下屆選超級區議會議席，咁公記同鄉事派更冇必要繼續幫民記喺新界東助選。如果真係咁，相信對民記現任立法會議員陳克勤影響就最大喇，民記力保兩席問題雖然唔大，不過跌票就少不免囉。
據講，沙田民政處其實早就同韋國洪講好會委任佢，等佢繼續做區議會主席，點知有人向當局施壓，講到明好想要個主席位，仲喺區選後一星期將呢個意願轉達沙田民政處添。呢個人係邊個？據講就係彭長緯。消息話，彭長緯嘅舉動好快就傳入公記中人耳仔，公記中人知道後，即時決定點都唔會讓個區議會主席位出嚟，齊心一致力捧公記何厚祥做下屆主席，彭長緯坐番原位，即係做副主席。
唔好唔記得，韋國洪除咗係公記靈魂人物外，另一身份係新界鄉議局執委；據講，自從韋國洪委任甩轆後，有鄉議局領導人建議佢拉隊選立法會，有原居民加埋公記支持，隨時贏得一席都唔奇。我哋搵過韋國洪本人，佢對傳聞不置可否，但承認「極度積極考慮」喺新界東出選立法會。
至於被指打小報告嘅彭長緯就否認其事，話自己絕無意思做主席，更無能力左右民政事務總署嘅決定。彭長緯亦話，自己唔知點解有呢啲消息傳出，沙田區內一直都好和諧咁話。點都好，明年立法會新界東選情七國咁亂，不過都要鄉事派同公記頂得住來自西環嘅壓力至得，否則幾有實力都無用武之地。