中環出更：劉展灝戴孖錶 賀新店開幕
工業總會副主席劉展灝（Stanley）今年認真福星高照，上月啱啱飲咗新抱茶，尋日全家再次戴起靚靚襟花，齊賀旗下高時錶行第五間分店開幕。到賀賓客逼爆尖沙咀K11購物藝術館新店，Stanley開心到兩手都戴住自家代理嘅瑞士珍達斐（Jean d'eve）靚錶，馬會大董葉澍堃（Stephen）笑稱，個個都學佢咁有創意，香港經濟就旺晒喇！
尋日下午約兩點，高時錶行無論店外店內都人頭湧湧，事關現身嘉賓星光熠熠，立法會議員梁君彥嘅細佬、新興織造廠董事總經理梁嘉彥、互太紡織非執董劉耀堂、香港錶廠商會會長蘇永強等人都喺度。Stanley夫婦率領新婚嘅大仔燊濤夫婦及細仔燊霆全家總動員，場面好熱鬧。
蘇永強愛女下月臨盆
擔任主禮嘉賓嘅Stephen話，自己戴錶唔追求貴價名牌，至緊要設計簡單及輕薄，好似珍達斐就好啱佢，佢曾經喺又一城分店買過。尋日Stanley貪新鮮戴上左手嘅，正係珍達斐最新時款玫瑰金超薄靚錶，售價約六萬五千元。
葉澍堃寧買酒唔買股
卓妮見蘇永強喜上眉梢，原來佢嘅愛女Sarah下月中臨盆，為家族添多名寶貝外孫仔。講起經濟市道，佢話唔好睇得太灰，事關喺啱啱過去嘅聖誕節，美國消費市道好過預期，唔少廠商都接到急單添！
Stephen就話，無論堪輿家或投資專家都睇淡明年經濟，身邊亦有好多朋友賣緊樓，奉勸大家咪投資股票，買酒好過，因為股票蝕晒將變牆紙，酒價大跌最多咪飲咗佢！