仲有個零月，夕陽政府就會宣布最後一份預算案，而每年預算案出台後，立法會議員都會入紙提質詢，近年提問數目屢創新高，夕陽政府中人年年都應付到怨聲載道。財經事務及庫務局局長陳家強（傻強）呼籲議員唔好將啲問答印出嚟，以免嘥紙，都唔知係咪借環保為名，暗寸啲議員問題多多。
傻強引述數據，用圖表加埋折線圖，分析○七年至今提問嘅數目走勢，原來幾年下來，議員提問由二千七百幾條增至近四千條，而今年回覆議員提問所用嘅紙張，多達一萬五千四百多頁，於是力勸議員用電子方式提問。
傻強借環保暗寸議員，怕且議員都好難駁佢。議員搏晒老命提問，當然亦係此風不可長，提問係監察政府嘅一個主要做法，政府固然要監察，不過議員問題愈問愈多，又唔見佢哋對政府嘅監察強咗同深入咗，議員嘅議事質素又唔見得提高咗。所以話，質幾時都比量重要。