政情：社民連會慶「襯家」齊撐場

尋日佢哋仲搞咗個拍賣環節，包括有一幅特首選舉參選人梁振英今年喺保釣聚會捐出嘅清明上河圖，同埋一幅由疑似立法會議員、長毛梁國雄女朋友繪畫嘅紮鐵工人畫。

尋日阿牛曾健成介紹幅紮鐵工人畫像時一時口快，話幅畫係長毛嘅女朋友所畫，但之後佢又更正，原來係長毛嘅「階級抗爭兄弟姊妹」兼好朋友陳清華所畫嘅，佢哋話希望今次活動至少籌到十萬蚊，幫補下社民連嘅經費啦。

旅遊界立法會議員謝偉俊尋日亦有拉埋老婆白韻琹出席，社民連嘅麥國風啱啱就係喺區選中輸咗畀白姐姐。民主黨主席何俊仁尋日都包咗一圍，鐵頭仁話自己同社民連一直都係朋友，雖然社民連嘅作風有時唔係咁成熟，又唔係咁理性，但都只係人生嘅一個階段喎。