政情:唐創時自愧未盡父責

既係一對仔女嘅爸爸,又係香港考試及評核局秘書長嘅唐創時,後年將會面對兩難局面。唐創時個女依家喺傳統名校拔萃女書院讀緊中五,即係第二屆中學文憑考試考生,到時唐創時唔單只要避嫌,缺席放榜前一日召開嘅記者會,唔准掂任何試卷,甚至連內部委員會會議都要避席,睇嚟佢到時應該係上任後最得閒嘅一年。

不過唐創時就坦言自己唔係一個勝任嘅家長,因為佢好少陪個女溫書應付考試,佢認為教子女學做人和為自己負責先係首要任務,其次先係學問。雖然口口聲聲話好少陪個女溫書,但唐創時眼見個女考試在即,仍投放大量時間喺課外活動上,坦言「我都有啲驚」。佢仲記得有一次個女準備參加辯論比賽,搞到好夜先返屋企,但第二日要測驗,佢當時滿以為個女會即刻返入房溫書,點知後來發現佢仲準備緊個比賽,令佢好擔心。

第一手消息請下載on.cc東方互動iPhone/iPad/Android Apps「Money18免費即秒股票報價網站」現推出8升級功能,財經資訊,實時實發!